Халықаралық аренадағы ОҚМА: Якутск қаласындағы «ХХІ ғасырдағы нейроғылым» конференциясына қатысу

2025 жылғы 4–5 маусым аралығында Якутск қаласында «ХХІ ғасырдағы нейроғылым: мәселелері мен болашағы» атты II Халықаралық ғылыми-тәжірибелік конференция өтті. Іс-шара Ресейдің түрлі өңірлерінен және жақын шетелдерден келген мамандарды, сондай-ақ жас ғалымдар байқауына қатысушыларды жинады. Конференция жүйке жүйесі ауруларын диагностикалау мен емдеудің өзекті мәселелерін талқылауға, тәжірибе алмасуға және медициналық мекемелер арасындағы ғылыми-кәсіби байланыстарды нығайтуға арналған бірегей алаңға айналды.
Конференцияны ұйымдастырушылар: М.К. Аммосов атындағы Солтүстік-Шығыс федералды университеті (РФ), «Кешенді медициналық мәселелер бойынша Якут ғылыми орталығы» (ФМҒЗИ), Саха Республикасының Денсаулық сақтау министрлігі, Саха Республикасының неврологтар ғылыми-тәжірибелік қоғамы және «Оңтүстік Қазақстан медициналық академиясы» АҚ (Қазақстан Республикасы).
Конференция жұмысына Оңтүстік Қазақстан медициналық академиясының (Шымкент қ., Қазақстан) неврология, психиатрия, реабилитология және нейрохирургия кафедрасының оқытушылары мен резиденттері белсене қатысты. Ашылу салтанатында Саха Республикасының денсаулық сақтау бірінші вице-министрі Дмитрий Дмитриевич Сергин және Якут ғылыми орталығының директоры Анна Николаевна Романова құттықтау сөз сөйледі.
Аймақаралық академиялық ынтымақтастықты нығайту аясында делегация мүшелері М.К. Аммосов атындағы СШФУ ректоры А.Н. Николаев және медициналық институт директоры Н.М. Гоголевамен кездесу өткізді. Кездесу барысында ғылыми әріптестік, тәжірибе алмасу және бірлескен білім беру бағдарламаларын жүзеге асыру мәселелері талқыланды.
Конференция аралас (офлайн және онлайн) форматта өтті. Негізгі тақырыптар: Паркинсон ауруы, бүйірлік амиотрофиялық склероз, Альцгеймер ауруы мен когнитивтік бұзылыстар, сирек кездесетін жүйке жүйесі аурулары, демиелинизация және цереброваскулярлық аурулар, нейрореабилитация, іргелі және трансляциялық неврология.
Бағдарлама аясында келесі шаралар өтті: жас ғалымдар байқауы, профессор Генри Холден мен Рауан Қайыржановтың шеберлік сыныбы, «Инсультті ерте оңалтудағы нейропротективтік терапия» симпозиумы.
Конференцияда шетелдік және ресейлік ғалымдар баяндама жасады. Олардың қатарында:
• Профессор Генри Холден (PhD), Лондон университет колледжінің Неврология институты (Ұлыбритания);
• Рауан Қайыржанов, Лондон университет колледжінің зерттеушісі (Ұлыбритания);
• Нодель Марина Романовна, медицина ғылымдарының докторы, профессор, Ресей Денсаулық сақтау министрлігіне қарасты Сеченов атындағы Бірінші МММУ-дің неврология және нейрохирургия кафедрасы (Мәскеу);
• Хатькова Светлана Евгеньевна, медицина ғылымдарының докторы, профессор, Ресей ФМБА-ға қарасты ФНКЦ Академиясының оңалту медицинасы кафедрасының меңгерушісі.
Ғылыми жетістіктер және мойындау
Конференцияда келесі ОҚМА өкілдері баяндама жасады:
• Жарқынбекова Назира Асановна – кафедра меңгерушісі, медицина ғылымдарының кандидаты, Түркістан облысы денсаулық сақтау басқармасының штаттан тыс бас неврологы;
• Бауржан Эльдар – 2-курс резидент, «Ересектердегі СМА мысалындағы нейробұлшықет ауруларын диагностикалау мен клиникалық бақылау» тақырыбындағы баяндамасымен жастар байқауында II дәрежелі дипломмен марапатталды;
• Қалжан Олжас – резидент-невролог, нейродегенеративті ауруларды ерте диагностикалау тақырыбын қарастырды;
• Окроадзе Отари – резидент-психиатр, «Созылмалы соматоформды ауырсыну бұзылысы» туралы клиникалық жағдай талдауын ұсынды.
Шекарасыз ғылым

ОҚМА өкілдерінің бұл халықаралық конференцияға қатысуы резиденттердің жоғары дайындық деңгейін, кәсіби дамуға ұмтылысын және ғылыми жұмыстарға белсенді қатысуын дәлелдеді. Мұндай іс-шаралар жаңа идеялармен шабыттануға, заманауи тәжірибемен танысуға және әріптестермен тәжірибе алмасуға мүмкіндік береді.