Қазақстан Республикасының Конституциясына – 30 жыл!
2025 жылы 30 тамызда Қазақстан Республикасының Конституциясына 30 жыл толып отыр. Осы айтулы датаға орай «Қазақстан тарихы және әлеуметтік-қоғамдық пәндер» кафедрасының аға оқытушысы М.М. Маликовтың «ҒЫЛЫМ. БІЛІМ. ТӘРБИЕ» атты республикалық ақпараттық ғылыми-педагогикалық газетінде «Қазақстан Республикасының Конституциясына – 30 жыл!» атты көлемді мақаласы жарық көрді.
Мақалада тәуелсіз еліміздің Конституциясының тарихи маңызы мен құқықтық мемлекетті қалыптастырудағы рөлі жан-жақты талданады. Автор Ата Заңымыздың қабылдану үдерісіне, оның негізгі қағидаттарына, адам құқығы мен бостандықтарын қорғаудағы орнына ерекше назар аударады.
М. Маликов өз мақаласында 1995 жылғы Конституцияның қабылдануы Қазақстанның саяси тұрақтылығы мен мемлекеттік басқару жүйесінің дамуына серпін бергенін атап өтеді. Сонымен қатар, Конституцияға енгізілген өзгерістер мен толықтырулардың қоғам сұранысына сай жүргізілгенін, олар елдің демократиялық дамуына жол ашқанын тілге тиек етеді. Мақалада заң үстемдігі, азаматтық қоғамды дамыту, билік тармақтарының өзара іс-қимылы, құқықтық мәдениетті қалыптастыру мәселелері де кеңінен қамтылған.
Мақала мерейлі мерекенің маңызын тереңнен түсінуге, Ата Заңымыздың мәні мен мазмұнын бағамдауға мүмкіндік береді.
