Ұлы Жеңіске – 80 жыл

Оңтүстік Қазақстан медициналық академиясының ЖТД-2 кафедрасының меңгерушісі, медицина ғылымдарының докторы, профессор Досыбаева Гүлжан Нұрбековна және оқытушылар Тасқынова Мая Әділбекқызы мен Жиен Азия Қасымқызы жетекшілігімен ЖТДҚ-06-23 тобының интерндері Ұлы Жеңістің 80 жылдығына арналған еске алу шарасын өткізді.
Бұл тарихи күнде интерндер Ұлы Отан соғысының ардагерлері — 1933 жылы туған Хамитова (Латыева) Надия Абдрахмановна мен 1930 жылы туған Бабичев Алексей Артемовичке арнайы барып, олардың жағдайын сұрап, медициналық көмек көрсетті. Болашақ дәрігерлер ардагерлерге олардың ерлігі мен Ұлы Жеңіске қосқан баға жетпес үлесі үшін алғыс айтып, ұзақ ғұмыр, денсаулық, тыныштық пен амандық тілеп, шынайы құрмет көрсетті.
Интерндер ардагерлердің соғыс жылдарындағы ауыр күндер, халықтың ұлы ерлігі және болашаққа деген жарық армандары туралы естеліктерін үлкен ықыласпен тыңдады. Бұл сәттер нағыз тарих пен адамгершілік сабағына айналды.
Іс-шараның жалғасы ретінде интерндер Абай саябағындағы Даңқ мемориалында болып, қаза тапқан батырлардың рухына тағзым етті. Мәңгі алаудың алдында гүлдер қойылып, бір минуттық үнсіздік жарияланды — бұл Ұлы Отан үшін өмірін қиғандарға деген терең алғыс пен құрмет белгісі болды.
Бұл іс-шараның мәні ерекше, себебі ЖТД-2 кафедрасының меңгерушісі, Гүлжан Нұрбековна Досыбаева жақында Беларусь Республикасында болып, соғыс болған жерлерді өз көзімен көрді. Бұл сапар еске алу шараларын өткізуге шабыт беріп, тарихи жадты сақтау мен оны жаңа ұрпаққа жеткізудің маңыздылығын тағы да есімізге салды.