Сәтті отаның негізі оқу аудиториясында қаланады

Топографиялық анатомия және гистология кафедрасында нағыз шыңдалу кезеңі. 
Оңтүстік Қазақстан медицина академиясының ВМ-МҚА-05-23 тобының 3-курс студенттері тәжірибелі оқытушы Д.А. Мурзанованың жетекшілігімен оперативтік хирургия және топографиялық анатомия әлеміне алғашқы нық қадамдарын жасауда.
Топографиялық анатомия — бұл жай ғана оқу пәні емес. Бұл — адам денесінің «картасы», онсыз ешбір хирургтың жолы болуы мүмкін емес. Біз сәтті отаның негізі осы жерде, оқу аудиториясында қаланатынына сенеміз. Мұнда студент тіндерді сезінуді, қабатты құрылысты түсінуді және әрбір қимылды автоматты түрде орындауды үйренеді.

Практикалық сабақтар — біздің оқуымыздың өзегі. Болашақ қиындықтарға қолды дайындау үшін студенттер іс-тәжірибелік дағдыларды аттестаттаудың (ТДА) инновациялық әдістерін қолданады:
• Зергерлік дәлдік: Биомодельдерді (банандар мен қызанақтарды) пайдалану адам организмінің нәзік тіндерімен жұмыс істеуді имитациялауға мүмкіндік береді.
• Құрал-сайман құдіреті: Ине ұстағыштар, скальпельдер мен хирургиялық жіптер студенттердің қолында жай құрал емес, өмірді сақтаудың құралына айналуда.
• Тәртіп пен ерік: Әрбір салынған тігіс — бұл өзіңді жеңу және кәсібилікке жасалған тағы бір қадам.
«Хирургия ота жасау бөлмесінен емес, үйренуге дайын жанның жүрегінен басталады. ВМ-МҚА-05-23 тобының ынтасына қарап, біз медицинамыздың болашағын көреміз. Олар — дәлдік, жауапкершілік және үнемі кемелденуді басты бағдар еткен дәрігерлер. Біз ОҚМА-да теория өмірге айналатын, ал әрбір студент өз күшіне сенімділік табатын жағдай жасаймыз», -- дейді оқытушы: Д.А. Мурзанова.